Ourense acollerá o vindeiro 13 de xuño a presentación da nova fotobiografía sonora de Ouvirmos, que ofrece unha aproximación innovadora á figura de Celso Emilio Ferreiro. Este novo exemplo de libro-arte editado por Ouvirmos obtivo gran repercusión nos medios de comunicación, chegando mesmo ás horas de máxima audiencia da TVG a través dos programas Miraxes (o sábado 17 de maio) e O país dos ananos (o domingo 18). Este volume, que se atopa xa á venda na web e nos puntos de venda habituais, achega ao público arredor de cen fotografías dunha das voces líricas máis importantes da nosa literatura, ademáis de 2 cd´s que recollen a súa voz e algúns dos temas musicais máis importantes que inspiraron os seus poemas.