Audacia, festival de artes e emprendemento

Audacia é a aptitude ou tendencia que impulsa ás persoas para realizar accións difíciles ou atrevidas. Audacia aspira a converterse nun evento anual de referencia baseado na posta en valor e potencialidades das artes e do emprendemento, na procura de novos formatos, novos públicos e novas propostas.

Organizamos “Audacia. Festival de Artes e Emprendemento” para a Fundación da Cidade da Cultura. Enmarcado na programación do Xacobeo 2021, foi o primeiro gran festival de artes contemporáneas e emprendemento de Galicia e celebrouse os días 18 e 19 de outubro do 2019 no Museo Gaiás da Cidade da Cultura de Galicia.

O obxectivo xeral deste proxecto é que a sociedade visibilice e valore a utilidade social das artes, valore a diversidade de artistas e dos seus procesos creativos relacionados directamente coa xeración de actividade económica. Valorización non só como actividade que xera riqueza, senón como actividade provedora de benestar social e autoestima colectiva. Queremos demostrar coa nosa proposta, o potencial económico do sector e por en valor as iniciativas artísticas galegas, que xa están actuando en sinerxia co resto de actores globais.

O festival contou ao longo das dúas xornadas con máis dun milleiro de persoas, entre elas, destacou especialmente o alumnado dos centros de ensinanzas artísticas, así coma emprendedores e artistas.

Os principais espazos de Audacia foron os seguintes:

Audacia Inspira. Charlas inspiradoras de artistas de diferentes eidos falaron da súa traxectoria, os seus comezos no mundo profesional e a superación de obstáculos. Oliver Laxe, Daniel Canogar, Miguelanxo Prado, Carlos Sedes ou Uqui Permui.

Audacia Emprende. Formación e consultoría para empredendores artísticos da man, entre outros, de Daniel Cerqueiro, María Yáñez e representantes da VEGAP, SGAE e A Colectiva.

Espazo expositivo. Zona de stands con presenza institucional, académica e de emprendedores. Contamos ademais cun showroom de empresas convidadas con Undo Redo, Arturo Álvarez e Idoia Cuesta.

Audacia Música. Actuacións musicais para pechar cada xornada. The Primitals, o venres, e Janet Novás e Mercedes Peón, o sábado.

Podes descargar aquí o programa completo e mapa do Festival.