Valentín Paz-Andrade

O home poliédrico -avogado, poeta, conferenciante, xornalista, político, empresario, etc.- que destacou polo seu compromiso con Galicia queda reflectido nesta Fotobiografia en todas as suas dimensións a través das máis de cen fotografías do seu álbum familiar. Unha mirada particular á intensa traxectoria vital do pontevedrés acompañada dos textos de Miguel Anxo Seixas Seoane.

As imaxes aparecen estruturadas en tres grandes etapas vitais, delimitadas pola guerra, a ditadura e a chegada da democracia. Os títulos baixo os que se desenvolven son: “1898-1936: Galicia labra a súa imaxe”, “1936-1975: Cen chaves de sombra” e “1975-1987: Sementeira do vento”. Tres capítulos que vertebran a Fotobiografía e deixan constancia das múltiples facetas que Paz-Andrade desempeñou sempre cun único compromiso: Galicia.