Ramón María Aller Ulloa

Foi pioneiro na investigación astronómica en Galicia e introdutor do estudo das estrelas dobres no Estado español. Construíu en Lalín o primeiro observatorio astronómico galego con fins científicos, e fundou o Observatorio Astronómico da Universidade de Santiago. No seu haber conta coa descuberta de catro estrelas dobres e unha extensa produción con centos de estudos e observacións sobre cuestións astronómicas e matemáticas, e os seus libros Algoritmia, Astronomía a simple vista e Introducción a la Astronomía, referente na universidade española durante anos. Dirixiu cinco teses doutorais e foi o primeiro en empregar o galego en astronomía nos seus ensaios da revista Logos.