García-Picos. Obra completa para quinteto de vento | Zoar | Selo Ouvirmos

«Ti has chegar moi lonxe rapaz», con esas palabras a un home novo, alentaba o mesmo Castelao ao noso protagonista, betanceiro emigrado e retornado, Carlos López García-Picos.

García-Picos é unha escolla das páxinas para ventos do compositor, coma un retrato no aire da figura de Carlos, debuxado, perfilado coa enerxía do vento, do vento dun quinteto que tiña desde hai tempo a ilusión e, dalgún xeito, a obriga de contar, aínda que dunha faragulla da obra de Picos nada máis se trate, o que Carlos nos reservou a todos: unhas marabillosas obras para quinteto, cuarteto e trío de vento.

Atendendo a que estas obras foron escritas desde 1954 até 1991, son un ollar ao pasado, á historia máis recente, case resumo dun pobo, como un corte limpo que verte a vida musical destes anos, cribados por un home de aquí e de alá, que ía e que viña, querido e respectado onde queira que fose. Velaí Zoar con esta escolma das obras de Carlos López García-Picos para ventos, sete pezas, coma sete pasos dun paseo de corenta anos.